OBROLAN PAGI DI UJUNG JALAN

CERMIN ( Cerita Mini ) Betawi

Karya 2004 : MUHABBA PUTRA

Ari baru pukul 09.00 pagi, panasnye mata-ari udah kaya penggorengan yang siap bakar kulit manusie. Pengojek pada nongkrong-nongkrong sambil nungguin penumpang, di ujung jalan Pecenongan tempat mereka mangkal. Sewe sepi karene ari ini memang ari ahad alias tanggal mere.
“Mendingan kite maen tebak-tebakan yo, “ cetus si Mamat yang memecah keheningan. “ Kite jangan tebak – tebakan buntut nomer mobil, apalagi ampe taroan. Taroan artinye same juge judi. Nah … judi ntu kan dilarang, baik ame agame maupun ame undang undang.”
Parjo langsung aja agak sewot lantaran omongan Mamat yang gayenye kayak orang nggak pernah disentuh ame dose. “ Eeeh Mat, sejak kapan elu jadi bener ?, “ sahut Parjo dengan logat betawi yang medok jawanye. “ Biasanye elu yang paling dulu bolak-balik kertas, corat-coret pake potlot, ngecak buntut. Tumben elu ari ini ngomong begitu.” lanjut Parjo.
Mamat nggak kalah komentar malah tetap nyerocos, “ Sekarang kan jamannye reformasi, kita juge harus ngadain pembaruan. Kerjaan nyang dilarang ame agame harus kite hindarin. Agame Islam ntu kan ngajarin kite ngelakuin ape yang diperinteh dan ngejauhin ape nyang dilarang. Begitu kan kate ustad Derahim ? Tahu kagak lu. “ Komentar si Mamat.

Nggak terasa obrolan itu makin jauh ampe jidat si Parjo ngrenyit lantaran dari tadi omongannye Mamat kaye ustad sejuta umat. Padahal agame buat Parjo cuma asal percaye aje.
“ Eeeh Jo, lu dari tadi kok diem aje. Kenape lu ? Lu kagak dengerin omongan gue atau lu cuekin gue seakan – akan gue gile.” tukas Mamat.
“ Sebenarnya gue tambah bingung ame keadaan elu,” jawab Parjo.
“ Sekarang gue tanya, apa lu Muslim ? “ tanya Mamat.
“ Tuh kan keadaan elu semakin nggak bener malah ngawur. Nama gue Parjo alias Panjul. Kok elu nanyain nama gue Muslim. Aneh kan ! “
“ Wah … gawat lu ! nyang gue tanya maksudnye ntu, apa lu beragame Islam ? “ kilah Mamat nyang dongkol.
“ Oh begitu ?! tapi gimane yeh, “ sambil mikir Parjo lantas ngeluarin Kartu Tanda Penduduk alias KTP dari dompetnye yang udah lusuh. “ Coba elu lihat sendiri di KTP ini, agame gue ape ? “ lanjut Parjo.
“ Agame lu ISLAM. Sejak kapan lu nganut agama Islam ? “ tanye Mamat sambil bolak – balik KTP nyang baru dipres.
“ Yah … sejak KTP ini dibuat. Ceritanye begini, gue kan orang kampung datang ke Jakarte untuk ngadu nasib. Mondar – mandir kesane-kamari ampek siang malem, nasib gue tetep nggak berubah. Pinginnye
gue nih punya penampilan wajah kampung nasib kota
tapi malah gue dapet nasib sial karene gue kena razia. Setelah itu gue dapet KTP, gratis lagi. Kire-kire 2 bulan yang lalu. “
“ Cck … cck … cck … ternyate lu selama ini akrab ame Mr. Dosa. Orang nyang banyak dosenye ntu, ntar bakalan dikirim ke Nerake. Asal lu tahu ! Mangkenye ,” lanjut Mamat, “ mumpung lu belon tue, bau taneh, cepetan lu bertobat.”
“ Aah … nggak usah tobat, biase – biase aje ngelakuin hidup ini. Ntar kite mati kan dikirimin doa ame keluarge dan keturunan kite agar kite diampuni dose – dosenye. Nah … pasti gue ntar dapet tiket masuk Surge. “ jawab Parjo dengan entengnye.
Muncul anaknya Mamat dgn tergopoh–gopoh sambil teriak, “ Be … babe … “
“ Ade ape Ntong ? Lu kaye kesamber petir aje. Siang ari bolong gini teriak – teriak.”
“ Aye mau kasih tau Mas Parjo kalo bininye … bininye … eeh … udah pulang aje deh mas ke rumah dulu ntar juga tahu ! “ Katanye.
“ Ade ape sih ? Kayak orang kebakaran jenggot. Memangnye bini gue kenape? “ tanya Parjo yang kalang kabut dibuatnye.
“ Pokoknya di rumah mas Parjo banyak Polisi .” si Ntong jelasin.
“ Mati rodok ! Emangnye gue jiper apa. Lihat aje kalo macem–macem.”sahut Parjo nantangin sambil pegi ngegas kenceng motornye.
“ Aye denger dari warge, kalo bininye ntuh nilep uang Arisan Kelurahan. be ” ### Wassalaam @BbaS ###

Koleksi : teater_gress@yahoo.com

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s


%d blogger menyukai ini: